హర్షవనం

ఆదిశంకరులు అద్వైత్వాన్ని బోధించి కొన్నివేల సంవత్సరాలు గడచిపోయినా ఇప్పటికీ ఆ తత్త్వాన్ని స‌రిగ్గా అర్థం చేసుకున్న వాళ్ళెందరో తెలియదు కాని దాన్ని అరాయించుకుని ఆచరించే వాళ్ళు మాత్రం అతి కొద్దిమందే. అద్వైత్వాన్ని అరగదీసేస్తున్నఘ‌నులు (నాతో క‌లిపేలెండి) ల‌క్ష‌ల్లోనే. ఆధ్యాత్మిక గురువు మాతృశ్రీ జిల్లెళ్ళమూడి అమ్మను ఎవరో భక్తుడు అద్వైత్వం అంటే ఏమిటని అడిగితే అమ్మ “అందరికీ అర్థమయ్యేలా చెప్పాలంటే అత్తగారు తన కోడల్ని, కూతుర్ని ఒకేలా చూడగలగడమే అద్వైతం” అని చెప్పారట. ఇదేమాట కోడలు వైపునుంచి చూస్తే అమ్మను, అత్తను ఒకేలా చూడ‌టం కూడా అద్వైతమౌతుందేమో కదా! ఇది ఎంత తేలికో అనుకుంటాం కాని ఆచ‌రిస్తే తెలుస్తుంది ఇది అయ్యే ప‌నికాద‌ని. ఈ అత్తాకోడళ్ళ మధ్య సయోధ్య కుదర్చడానికేమో కవిగారు అత్తలేని కోడలుత్తమరాలు ఓయమ్మా అంటూనే కోడల్లేని అత్త గుణవంతురాలు అని కూడా అనేసి ఇద్దరికీ win-win situation క‌ల్పించి సేఫ్‌గా తప్పుకున్నాడు.

అద్వైత్వాన్ని ఇంకొంచెం దగ్గర చేసుకుని చూద్దాం. సింపుల్‌గా చెప్పాలంటే ఎదుటివారి బాధ చూసి మనబాధే అనుకుని చలించిపోతే empathy (అద్వైతం), ఎదుటి వారి బాధను చూసి మనం బాధపడితే Sympathy (విశిష్టాద్వైతం), ఎదుటివారి బాధను చూసీ చూడనట్లుపోతుంటే apathy (ద్వైతం). ఇలా పోయేటోళ్ళను కాపాడాల్సింది మాత్రం ఆ సీతాపతే. పూర్వం షేక్‌స్పియ‌ర్ నాట‌కం చూడ్డానికి వెళ్ళిన రాకూమారి స్టేజిపై నాట‌కంలో కింగ్ లియ‌ర్ ప‌డుతున్న క‌ష్టాలు చూడ‌లేక గౌను త‌డిచి పోయేలా వెక్కివెక్కి ఏడ్చిండ‌ట‌. వాస్త‌వ జీవితంలో ఎముక‌లు కొర‌కే చ‌లిలో థియేట‌ర్ బ‌య‌ట గ‌జ‌గ‌జ వ‌ణుకుతున్నత‌న‌ జ‌ట్కా వాడు రాకుమారికి గుర్తుకు రానే రాలేద‌ట‌. స్టేజ్ పైని కింగ్ లియ‌రే సత్యం జ‌ట్కావాడు మిధ్య అనుకునే త‌త్త్వం ఆమెది.

Love thy neighbour as you love thyself (నీ వలెనే నీ పొరుగు వానిని ప్రేమించుము) అనే బైబిల్‌ చెబుతోంది. ఇది సగమే అర్థంచేసుకున్న మన పిల్లలు పొరుగు పిల్ల‌నో, పిల్లోడ్నో ప్రేమించేస్తారు. అప్పుడు అది వేలంటైన్‌ తత్త్వం అవుతుంది.

మన భారతంలో సైతం తిక్క‌న‌గారు అద్వైతాన్ని …..

“ఒరులే యవి యొనరించిన

నరవర! యప్రియము తన

మనంబునకగు తా

నొరులకునవి సేయకునికి

పరాయణము పరమ ధర్మ పథములకెల్లన్‌” అని మ‌న‌ని హెచ్చ‌రించారు.

సంకీర్తనాచార్యులు అన్నమయ్య కూడా ‘ఎదిరికెప్పుడు చేయు హితమెల్ల తనదని చదివి చెప్పని అట్టి చదువేల’ అని చదువుల సారాన్ని విశదీకరించారు.

అనునిత్యం మనల్ని కనిపెట్టి ఉండే మన పని వాళ్ళకు, మన డైనింగ్‌ టేబుల్‌ మీదే మీరు అన్నం పెట్టగలిగితే మిమ్ముల్ని మించిన అద్వైతులు లేరు. మన ఇంట్లో కనీసం ఎక్కడో దగ్గర వారికి తిన‌డానికేమైనా పెడితే విశిష్టాద్వైతం. ఎప్పుడూ ఎవ్వరికీ, ఎక్కడా ఏమీ పెట్టకపోవడమే ద్వైతం. అలాగే మెగావెడ్డింగ్‌ చేస్తూ అతిథులకు వారిని తోలుకు వచ్చిన డ్రైవర్లకూ ఒకే లాంటి భోజనం పెడితే మీరు అద్వైతులే. కనీసం వారికి ఫుడ్ ప్యాకెట్టైనా ఇస్తే మీరు విశిష్టాద్వైతులు. అట్టి వారి ఉనికే మీకు స్పృహలో లేకపోతే మీరు ఖ‌చ్చితంగా ద్వైతులే.

ఒక ఊరిలో మంచి చేయి తిరిగిన స‌ర్జ‌న్ కూర‌లు త‌రిగిన‌ట్లు రోజుకు నాలుగైదు స‌ర్జ‌రీలు చేస్తూ పేషంట్స్ బాబోయ్ నొప్పి అంటే ఓస్ ఆ మాత్రం ఓర్చుకోలేక‌పోతే ఎలా అనేవాడ‌ట‌. కాలం క‌లిసి రాక స‌ద‌రు స‌ర్జ‌న్ గారికీ చిన్న స‌ర్జ‌రీ అయ్యింద‌ట‌. అప్పుడు ఆయ‌న ప్ర‌పంచంలో నాకున్నంత బాధ‌ నొప్పి ఎవ్వ‌రికీ ఉండ‌ద‌ని స్టేట్ మెంట్ ఇచ్చాడ‌ట‌. అవును మ‌రి ఇప్ప‌టి వ‌ర‌కు కోసింది ఊరోళ్ళ‌ను క‌దా త‌న‌దాకా వ‌స్తేనే ఏ త‌త్త్వం అయినా బోధ‌ప‌డేది.

నాకు తెలిసినంతలో కొంద‌రు రాజకీయ‌నేత‌ల్లా అద్వైతాన్ని అ(పా)ర్థం చేసుకున్నవారు మరొకరు కనపడరు. నీవు, నేను వేరు కాదు అని మనసా వాచా నమ్మే వీరు తన మన బేధం చూపక వారు మోజు ప‌డిన ఇళ్ళను, స్థలాలను, ఎదుటివారి నుండి క‌బ్జా చేసేస్తున్నారు. నువ్వు నేను ఏకాత్మలమైనప్పుడు నీ దగ్గరుంటే ఒకటి నా దగ్గరుంటే ఒకటా అని వారి ప్రగాఢ విశ్వాసం.

మ‌న పురాణాల్లో వేట‌కు వెళ్ళి దారిత‌ప్పి ఆక‌లితో అల‌మ‌టిస్తున్న రాజు విశ్వ‌ర‌థునికి (సెకండాఫ్‌లో విశ్వామిత్రుడు) అత‌ని సైన్యానికి శ‌బ‌ల (నందిని) అనే గోమాత కృప‌తో వ‌శిష్ఠ మ‌హ‌ర్షి మంచి విందు భోజ‌నం పెట్టాడ‌ట‌. విందార‌గించిన విశ్వ‌ర‌థుడు మ‌హిమ‌గ‌ల ఆ గోమాత‌ను త‌న‌కివ్వ‌మ‌ని అడిగితే వ‌శిష్టులు నిరాక‌రించ‌డంతో ర‌జోగుణోపేతుడైన రాజు అప్ప‌టిక‌ప్పుడు ఆ గోవును State property గా (జాతీయ‌సంప‌ద‌గా) డిక్లేర్ చేసి (మ‌న‌రాష్ట్ర ప్ర‌భుత్వాలు అర్థ‌రాత్రి G.O లు జారీచేసిన‌ట్లు) బ‌ల‌వంతంగా ప‌ట్టుకుపోవ‌డానికి ప్ర‌యత్నించి భంగప‌డ్డాడ‌ట‌. మ‌న నేత‌ల క‌బ్జాల‌కు విశ్వామిత్రులే స్ఫూర్తి ప్ర‌దాత‌లు అనుకోవాలి. వీరి బాటలోనే కొందరు వేదాంతులు.

‘అన్నమైతేనేమిరా? మరి

సున్నమైతేనేమిరా? అందుకే ఈ

పాడుపొట్టకు అన్నమే వేతామురా!’

అని తత్త్వాన్ని పాడుతూ రెంటికీ తేడాలేన‌ప్పుడు అన్నమే వేస్తేపోలా అని పాడుపొట్ట‌కు అన్నమే వేసే పరమలౌక్యులు.

పూర్వం ఒక విదేశీ భక్తుడు భగవాన్‌ రమణ మహర్షిని “How to treat others”అని అడిగితే రమణులు “There are no others” అని చెప్పారట. ఎదుట ఎవ్వడూ లేడు (అది నువ్వే) అని అద్వైతాన్ని ఏకవాక్యాత్మ‌కంగా ఇంత అద్భుతంగా చెప్పగలగడం జ్ఞాన స్వరూపులు భగవాన్‌కే సాధ్యం.

మనం రమణులు చెప్పిన ఉన్నత అద్వైత స్థితికి చేరుకులేక‌పోయినా సాటిమనిషి మనలాగే అనుకోకపోయినా క‌నీసం మనిషిగా గుర్తించి స్పందించగలిగితే మ‌నం అద్వైత మందిరానికి ఆరుమెట్లు ఎక్కేసి, ఉత్త‌మ అనుష్ఠానం చేసేసినట్లే.